ജീവിതയാത്ര

തിരിച്ചുവരവ്

2012-01-31T16:40:00.002+05:30

ഒരിടവേളക്കു ശേഷം.... വീണ്ടും ഇടവേളകളുണ്ടായേക്കാം....

എന്റെ പാര്‍ട്‌ണര്‍ അപകടത്തില്‍ മരിച്ചു

2009-10-04T18:51:00.004+05:30

പ്രിയ വായനക്കാരെ, ക്ഷമിക്കുക. ഈ വാര്‍ത്ത ബ്ലോഗിലിടാന്‍ വളരെ വൈകിപ്പോയി.

എന്റെ ബിസിനസ്‌ പാര്‍ട്‌ണറും (പാര്‍ട്‌ണര്‍, പ്രിന്റ്‌സോണ്‍ ഓഫ്‌സെറ്റ്‌ പ്രസ്‌, വൈലത്തൂര്‍, മലപ്പുറം ജില്ല) സുഹൃത്തുമായ മുഷ്‌താഖ്‌ അലി (കുഞ്ഞുട്ടി) 2009 സെപ്‌തമ്പര്‍ 22 തിങ്കളാഴ്‌ച (ചെറിയ പെരുന്നാളിന്‌ പിറ്റേദിവസം) ദേശീയപാതയില്‍, മലപ്പുറം ജില്ലയിലെ കൊളപ്പുറത്ത്‌ വെച്ചു നടന്ന അപകടത്തില്‍ മരിച്ചു.

സ്വന്തം വാഹനമായ ക്വാളിസില്‍ താനാളൂരിലെ ഒരു കുടുംബവുമായി മൈസൂരിലേക്കുള്ള യാത്രക്കിടയില്‍ എതിരെ വന്ന ലോറി മുഷ്‌താഖലി ഓടിച്ചിരുന്ന ക്വാളിസിലേക്ക്‌ വന്നിടിക്കുകയായിരുന്നു.

വീട്ടുകാരുടെയും നാട്ടുകാരുടെയും കുടുംബത്തിന്റെയും സുഹൃത്തുക്കളുടെയും പ്രിയങ്കരനായ സുഹൃത്തിന്റെ വിടവാങ്ങല്‍ ഈ പ്രദേശത്താകെ ദുഃഖം പടര്‍ത്തി.

അദ്ദേഹത്തിന്റെ സ്വദേശം തുവ്വക്കാട്‌ ആണ്‌. ചെറുപ്പത്തില്‍ കുറെ കാലം വൈലത്തൂര്‍ നഴ്‌സറിപ്പടിയിലെ മാതാവിന്റെ വീട്ടിലായിരുന്നു. അതിനാല്‍ അദ്ദേഹത്തിന്റെ സുഹൃദ്‌ബന്ധങ്ങളും ബിസിനസ്‌ ബന്ധങ്ങളും വൈലത്തൂര്‍ കേന്ദ്രീകരിച്ചായിരുന്നു. പ്രസ്സ്‌, റിയല്‍ എസ്റ്റേറ്റ്‌, വാഹന വില്‍പന തുടങ്ങി വിവിധ ബിസിനസ്‌ മേഖലകളില്‍ സജീവമായിരുന്നു.

പിതാവ്‌: തയ്യില്‍ കൊടവട്ടത്ത്‌ മൊയ്‌തീന്‍കുട്ടി ഗുരുക്കള്‍. മാതാവ്‌: സൈനബ. ഭാര്യ: ഷൈനി. മക്കള്‍: ഉമറുല്‍ ഫാറൂഖ്‌(4), ഫാത്തിമ നിദ(2).

പെരുന്നാള്‍പിറ്റേന്നായതിനാല്‍ പലരും തീര്‍ത്ഥയാത്രകളിലും മറ്റു യാത്രകളിലുമായിരുന്നു. ചിലര്‍ യാത്രകള്‍ മാറ്റിവച്ച്‌ ദുഃഖഭാരത്തോടെ സ്ഥലത്തെത്തി. എങ്കിലും അഭൂതപൂര്‍വ്വമായ ജനക്കൂട്ടത്തിന്റെ സാന്നിധ്യത്തിലാണ്‌ ഖബറടക്കം നടന്നത്‌. കന്മനം കരുവാത്തുകുന്ന്‌ മഹല്ല്‌ ജുമാമസ്‌ജിദില്‍ നടന്ന മയ്യിത്ത്‌ നിസ്‌കാരത്തിന്‌ പൊന്മള അബ്ദുല്‍ഖാദര്‍ മുസ്‌്‌ലിയാര്‍, നേതൃത്വം നല്‍കി. കാന്തപുരം എ.പി. അബൂബക്കര്‍ മുസ്‌്‌ലിയാര്‍, സയ്യിദ്‌ യൂസുഫുല്‍ ബുഖാരി, എന്‍.ബാവ മുസ്‌്‌ലിയാര്‍, അബ്ദുറഹ്‌്‌മാന്‍ രണ്ടത്താണി എം.എല്‍.എ., ഡോ. കെ.ടി. ജലീല്‍ എം.എല്‍.എ., അബ്ദുറസാഖ്‌ സഖാഫി വെള്ളിയാമ്പുറം, ബശീര്‍ പറവന്നൂര്‍, ബശീര്‍ ചെല്ലക്കൊടി, എ.എ. റഹീം, ടി.എം. ബശീര്‍ തുടങ്ങിയ പ്രമുഖര്‍ പരേതന്റെ വസതി സന്ദര്‍ശിച്ചു.

പരേതനോടുള്ള ആദരസൂചകമായി വൈലത്തൂര്‍, കുറ്റിപ്പാല ടൗണുകളില്‍ വ്യാപാരികള്‍ ഹര്‍ത്താല്‍ ആചരിച്ചു.

ബോംബെ മഴക്കാഴ്‌ചകള്‍ (ഇ-മെയിലില്‍ കിട്ടിയത്‌)

2009-07-18T15:30:00.002+05:30

ബ്ലോഗ്‌ മീറ്റ്‌ പുരസ്‌കാരങ്ങള്‍ നല്‍കുന്നു

2009-07-10T22:24:00.001+05:30

ഉടനെ നടക്കാനിരിക്കുന്ന ബൂലോക മീറ്റിംഗില്‍ പങ്കെടുത്ത്‌ മികവ്‌ കാണിക്കുന്നവരെ ആദരിക്കാന്‍ ആള്‍കേരള ബ്ലോഗ്‌ മീറ്റ്‌ കുളം കലക്കല്‍ അസോസിയേഷന്‍ (എ.കെ.ബി.എം.കെ.കെ.എ.) ആലോചിക്കുന്നു. ഏറ്റവുംകൂടുതല്‍ മികവ്‌ നേടുന്നയാള്‍ക്ക്‌ മാന്‍ ഓഫ്‌ ദ മീറ്റ്‌ അവാര്‍ഡ്‌ നല്‍കും.
എന്‍ട്രികള്‍ സ്വീകരിക്കുന്നില്ല. പകരം മീറ്റിംഗ്‌ ഹാളില്‍ എകെബിഎംകെകെഎ രഹസ്യഅനലൈസര്‍ക്യാമറ സ്ഥാപിക്കുന്നതാണ്‌. അതിലെ വിവരങ്ങള്‍ വിലയിരുത്തിയാകും പുരസ്‌കാരങ്ങള്‍ നല്‍കുക.

താഴെ പറയുന്ന കഴിവുകള്‍ പ്രകടിപ്പിക്കുന്നവരെ മാത്രമേ ഈ പുരസ്‌കാരങ്ങള്‍ക്ക്‌ പരിഗണിക്കുകയുള്ളൂ.

മീറ്റിംഗ്‌ നടക്കുന്ന ദിവസവും അതിനു മുന്‍പുള്ള രണ്ടു ദിവസങ്ങളിലും കുളിക്കാനോ വസ്‌ത്രം മാറാനോ പാടില്ല.

പരിപാടിക്ക്‌ നേരത്തെതന്നെ ഒരുകാരണവശാലും എത്താന്‍ പാടില്ല. ഭക്ഷണം വിളമ്പുന്നതിന്‌ 5 മിനുറ്റ്‌ മുമ്പ്‌ മാത്രമായാല്‍ വളരെ നന്നായി.

റജിസ്‌ട്രേഷന്‍ ഫീസ്‌ ഒരു കാരണവശാലും നല്‍കരുത്‌. നേരംവൈകിച്ചെന്നാല്‍ റജിസ്‌ട്രേഷന്‍ കൗണ്ടറിലെ ആളൊക്കെ പോയിരിക്കും. ഇനി തേടിപ്പിടിച്ച്‌ വന്നാല്‍തന്നെ തട്ടുത്തരം പറഞ്ഞ്‌ മാറിക്കളിക്കണം.

ബസ്സില്‍ വരുന്നവര്‍ ബസ്സിറങ്ങി ഓട്ടോ വിളിച്ച്‌ വരികയും ഓട്ടോ നിര്‍ത്തിയ ഉടനെ ഹാളില്‍ കയറി ഏതെങ്കിലും മൂലയിലേക്ക്‌ മുങ്ങുകയും വേണം. അങ്ങനെ ഓട്ടോചാര്‍ജ്ജ്‌ സംഘാടകരെക്കൊണ്ട്‌ കൊടുപ്പിക്കേണ്ടതാണ്‌.

സീറ്റിലിരിക്കുമ്പോള്‍ കാലുകള്‍ മുന്‍സീറ്റിലിലേക്ക്‌ കയറ്റിവെച്ചിരിക്കണം. കാലുകള്‍കൊണ്ട്‌ മുന്‍പിലിരിക്കുന്നയാളുടെ മേനി തലോടിക്കൊണ്ട്‌ സ്‌നേഹം പ്രകടിപ്പിക്കണം.

ഭക്ഷണം എന്നു പറയുമ്പോഴേക്ക്‌ ചാടിയെണീറ്റ്‌ കൈ കഴുകാതെ ഈറ്റിംഗ്‌ സീറ്റില്‍ ഉപവിഷ്‌ടനാകണം.

മീറ്റിംഗില്‍ പങ്കെടുക്കുന്ന മറ്റു ബ്ലോഗര്‍മാരെ തോണ്ടിയും തല്ലിയും ചീത്തവിളിച്ചും കൈകാര്യം ചെയ്‌തുകൊണ്ട്‌ ബ്ലോഗ്‌ മീറ്റ്‌ സജീവമായി നിലനിറുത്തേണ്ടതാണ്‌.

മുഖത്ത്‌ ഒരിക്കലും ചിരി പാടില്ല.

ഹാന്‍ഡ്‌ഷേക്ക്‌ നല്‍കുമ്പോള്‍ സഹബ്ലോഗര്‍മാരെ വേദനിപ്പിക്കുന്നവിധം കൈകള്‍ അമര്‍ത്തിപ്പിടിക്കേണ്ടതാണ്‌.

മീറ്റിംഗ്‌ ദിവസം പുറത്തുനിന്ന്‌ ഭക്ഷണമൊന്നും കഴിക്കാന്‍ പാടുള്ളതല്ല. മീറ്റിംഗുകളിലെ വിരുന്നില്‍, മിനിമം മൂന്ന്‌ പേര്‍ക്കെങ്കിലുമുള്ള ഭക്ഷണം കഴിച്ചിരിക്കേണ്ടതാണ്‌. മറ്റുള്ളവരുടെ പ്ലെയിറ്റില്‍ കയ്യിട്ട്‌ വാരിയിട്ടുണ്ടെങ്കില്‍ ജൂറിയുടെ പത്യേക പരാമര്‍ശത്തിന്‌ പരിഗണിക്കുന്നതാണ്‌.

ഭക്ഷണം കഴിച്ച ശേഷം കൈ കഴുകാതെ കയ്യിലുള്ള അവശിഷ്‌ടങ്ങള്‍ മുഴുവന്‍ കുടഞ്ഞ്‌ ഹാളില്‍ വിതറി തന്റെ മഹത്തായ സാന്നിധ്യം അറിയിക്കേണ്ടതാണ്‌.

മീറ്റിംഗില്‍ മൈക്കെടുത്ത്‌ ആരെങ്കിലും പ്രസംഗിച്ചുകൊണ്ടിരിക്കുമ്പോള്‍ കസേരയിലിരുന്ന്‌ ഉറങ്ങിത്തൂങ്ങിയവരായിരിക്കണം. ഉണര്‍ന്നിരിക്കുകയാണെങ്കില്‍ മൈക്ക്‌ പിടിച്ചുവാങ്ങുകയും മേക്കിട്ടുകയറി സംസാരിക്കുകയും ചെയ്‌തിരിക്കണം.

മീറ്റില്‍ സി.ഡി., പുസ്‌തകങ്ങള്‍ തുടങ്ങി വിവിധയിനങ്ങള്‍ പ്രദര്‍ശനത്തിനും വില്‍പ്പനക്കും വെച്ചിരിക്കും ഇവയെല്ലാം ഓരോന്ന്‌ പരിശോധിക്കാന്‍ വാങ്ങി മെല്ലെ കൈക്കലാക്കണം.

എന്തെങ്കിലും എഴുതിയെടുക്കാനുണ്ടെങ്കില്‍ മറ്റുള്ളവരുടെ കയ്യില്‍നിന്ന്‌ പേനയും കടലാസും വാങ്ങണം. ഇവ ഒരു കാരണവശാലും തിരിച്ചുകൊടുക്കരുത്‌.

തിരിച്ചുപോകാനുള്ള പണം കയ്യിലുണ്ടെങ്കില്‍തന്നെയും മറ്റു ബ്ലോഗര്‍മാരില്‍നിന്ന്‌ കടം വാങ്ങുകയും അടുത്ത മീറ്റിംഗ്‌സമയത്ത്‌ തരാമെന്ന്‌ പറയുകയും ചെയ്യേണ്ടതാണ്‌. (തരില്ല എന്ന്‌ ഈ സമയത്ത്‌ മനസ്സില്‍ പറയണം)

എ.കെ.ബി.എം.കെ.കെ.എ. കീജയ്‌....!!!

ഒരു ഗള്‍ഫ്‌ നൊമ്പരം

2009-06-03T07:58:00.001+05:30

സഹോദരിമാരുടെ വിവാഹ സ്വപ്‌നങ്ങള്‍ സാക്ഷാത്‌ക്കരിക്കുന്നതിനുവേണ്ടിയാണ്‌ എന്റെ സുഹൃത്തിന്റെ സുഹൃത്ത്‌ ഗള്‍ഫിലേക്ക്‌ കയറിയത്‌. നാട്ടിലായിരുന്നപ്പോള്‍ ഒരിക്കല്‍ ഞാനും അദ്ദേഹവുമായി സംസാരിച്ചിരുന്നു.
വിസക്ക്‌ പൈസയൊന്നുമില്ല. യു.എ.ഇ.യിലാണ്‌ ജോലി. അവിടെ ചെന്നു പണിയെടുത്തു മാസം തികഞ്ഞപ്പോള്‍ കിട്ടിയത്‌ പതിനയ്യായിരം ഇന്ത്യന്‍ രൂപ. വിസക്ക്‌ പൈസ കൊടുക്കാത്തതിനാല്‍ ആ വിഹിതത്തിലേക്ക്‌ മാസത്തില്‍ 3000 രൂപ കൊടുക്കണം. ഭക്ഷണം, താമസം, മറ്റുള്ളവ... ഈ ഇനത്തില്‍ മാസച്ചെലവ്‌ 9000 രൂപ. ബാക്കി 3000 രൂപ.
ഇങ്ങനെയാണെങ്കില്‍ നാട്ടില്‍തന്നെ നിന്നാല്‍ പോരേ? വേദന കടിച്ചിറക്കി അദ്ദേഹം ചിന്തിക്കുന്നു. പൂവണിയാത്ത സ്വപ്‌നങ്ങളുമായി...

ബ്ലോഗര്‍മാര്‍ ഒഴുകിവന്ന തൊടുപുഴ

2009-05-26T08:27:00.012+05:30

ബ്ലോഗുകളിലൂടെ പരതിനടക്കുന്നതിനിടയിലാണ്‌ ഒരു ദിവസം അത്‌ ശ്രദ്ധിച്ചത്‌. ഹരീഷ്‌ തൊടുപുഴയുടെ നേതൃത്വത്തില്‍ ഒരു ബ്ലോഗ്‌ മീറ്റ്‌ നടത്തുന്നതിനുള്ള ശ്രമങ്ങള്‍ നടക്കുന്നു. തിയ്യതി എന്നാവണമെന്ന ചര്‍ച്ച നടക്കുകയാണ്‌. ഞാന്‍ ഇടയ്‌ക്കു കയറിപ്പറഞ്ഞു- തിയ്യതിച്ചര്‍ച്ച നിര്‍ത്തി ഉറച്ചൊരു തീരുമാനമെടുക്കണം. ഞാന്‍ ഏതായാലൂം പങ്കെടുക്കും.

ബ്ലോഗിലൂടെ പിന്നീടറിഞ്ഞു, മെയ്‌ 24-ാം തിയ്യതിയാണ ്‌പരിപാടിയെന്ന്‌.

പിന്നീട്‌, ദൂരം കൂടുതലായതിനാല്‍ ചെറുതൊയൊന്ന്‌ ഊരാന്‍ ഞാന്‍ ശ്രമം നടത്തി. മെയ്‌ 23-ന്‌ ഹരീഷിന്‌ വിളിച്ചു- നമ്മളുടെ ഒരു കുറവുകൊണ്ട്‌ പരിപാടി നടക്കാതിരിക്കേണ്ട എന്നുകരുതി ഉറപ്പ്‌ പറഞ്ഞതാണ്‌. ഞാന്‍ വരണോ? അദ്ദേഹം പറഞ്ഞു- നിര്‍ബന്ധമായും വരണം. വാക്ക്‌ ലംഘിക്കുന്നത്‌ മാന്യതയല്ലല്ലോ? അതുകൊണ്ടുതന്നെ, ഞായറാഴ്‌ച നടക്കേണ്ട സുഹൃത്ത്‌ മുനീറിന്റെ വിവാഹത്തിന്‌ 23ന്‌ രാത്രി പങ്കെടുത്ത്‌ അന്നുതന്നെ രാത്രി 11 മണിക്ക്‌ ഞാനും സുഹൃത്ത്‌ റാസിഖും കൂടി തൊടുപുഴയിലേക്ക്‌ യാത്ര പുറപ്പെട്ടു.

വൈലത്തൂരില്‍ നിന്നും കോട്ടക്കലിലേക്ക്‌ ബസ്‌, അവിടെനിന്നും മൂവാറ്റുപുഴയിലേക്ക്‌. മൂവാറ്റുപുഴയിലെ കെ.എസ്‌.ആര്‍.ടി.സി. സ്റ്റാന്റില്‍ കുറേ നേരം സിമന്റ്‌ ബഞ്ചിലിരുന്ന്‌, ഉറങ്ങിയും ഉണര്‍ന്നും ചെലവഴിച്ചു. പിന്നെ നേരെ തൊടുപുഴയിലേക്ക്‌.

പുലര്‍ച്ചെ തന്നെ സ്ഥലത്തെത്തി. ടൗണില്‍ കുറേ അങ്ങോട്ടുമിങ്ങോട്ടും നടന്നു നേരം കണക്കാക്കി. പിന്നെ, കുറച്ചുസമയം പത്രവായന.
കാലിച്ചായ കുടിക്കാമെന്നു കരുതിയാണ്‌ ഹോട്ടലില്‍ കയറിയത്‌. കയറിനോക്കിയപ്പോള്‍ പലരും നന്നായി 'തട്ടുന്നു'. സാധാരണ പ്രഭാതഭക്ഷണത്തിന്റെ നേരംവച്ച്‌ നോക്കുമ്പോള്‍ ഇത്‌ നേരത്തെയാണ്‌. ഏതായാലൂം ഞങ്ങളും ഭക്ഷണം കഴിച്ചു പുറത്തിറങ്ങി.

ഒന്നു കുളിച്ചുഫ്രഷാകണമെന്ന ആഗ്രഹമുണ്ടായിരുന്നു.

ഏകദേശം 7 മണിയായപ്പോള്‍ ഹരീഷിന്‌ വിളിച്ചു- ഞങ്ങളിവിടെയെത്തിയിട്ടുണ്ട്‌. കേള്‍ക്കേണ്ടതാമസം നിമിഷങ്ങള്‍ക്കകം അദ്ദേഹം കാറുമായി ഞങ്ങള്‍ നിന്നിരുന്ന ഗാന്ധിസ്‌ക്വയറിലെത്തി. ഹരീഷ്‌ തൊടുപുഴ എന്ന സ്‌ക്രീനില്‍ കാണുന്ന ആ സ്‌നേഹമനുഷ്യനെ ഞങ്ങള്‍ നേരിട്ടുകണ്ടപ്പോള്‍ എന്തെന്നില്ലാത്ത സന്തോഷം മനസ്സിലൂറിവന്നു. അദ്ദേഹം ഞങ്ങളെ ഹോട്ടല്‍മുറിയിലേക്ക്‌ കൂട്ടിക്കൊണ്ടുപോയി.

അവിടെ തലേ ദിവസമെത്തിയ അനില്‍@ബ്ലോഗും, ചാണക്യനുമുണ്ടായിരുന്നു. അവരുടെ ഉറക്കച്ചടവിനിടയില്‍ ഏതാനും നേരം ചില വര്‍ത്തമാനങ്ങള്‍. ഒരാള്‍ ഡോക്ടറും മറ്റെയാള്‍ പത്രപ്രവര്‍ത്തകനുമാണ്‌. പ്രാഥമിക കൃത്യങ്ങള്‍കഴിഞ്ഞു ഫ്രഷായി. അല്‍പ്പസമയത്തിനകം കാലിച്ചായ എത്തി.

വീണ്ടും അല്‌പസമയം കുശലം പറഞ്ഞ്‌, ഓരോരുത്തരായി ഫ്രഷായിക്കഴിഞ്ഞ്‌ റൂമില്‍നിന്നും പുറത്തിറങ്ങി.

മീറ്റിംഗ്‌ നടക്കുന്ന അര്‍ബന്‍ ബാങ്ക്‌ ഓഡിറ്റോറിയത്തിലെത്തിയപ്പോഴേക്കും പലരും എത്തിക്കഴിഞ്ഞിരുന്നു. പിന്നെ, അനൗദ്യോഗികമായി വ്യക്തിപരമായ പരിചയപ്പെടലുകളായി.

നിരക്ഷരനെ പരിചയപ്പെട്ടപ്പോള്‍ കൗതുകം തോന്നി. ഫോട്ടോയില്‍ കാണുന്ന നീട്ടിവളര്‍ത്തിയ മുടിയൊന്നും കാണുന്നില്ല. എല്ലാം വെട്ടിയൊതുക്കിയ ഒരു ചുള്ളന്‍..! അദ്ദേഹത്തിന്‌ ഒരു പത്ത്‌ വയസ്സെങ്കിലും കുറഞ്ഞപോലെ- ബ്ലോഗര്‍മാരില്‍ പലരും അഭിപ്രായപ്പെട്ടു.

ഇടയ്‌ക്ക്‌ പ്രഭാതഭക്ഷണം കഴിക്കാത്തവരെ തിരഞ്ഞുപിടിച്ച്‌ ഹരീഷ്‌ ഭക്ഷണംകഴിപ്പിച്ചുവിട്ടു.

ഇനി മീറ്റിംഗ്‌ ആരംഭിക്കുകയായി. കസേരകള്‍ വട്ടത്തിലിട്ടു എല്ലാവരും അഭിമുഖമായിരുന്നു. മൈക്ക്‌ കൈമാറി എല്ലാവരും സ്വയം പരിചയപ്പെടുത്തലാരംഭിച്ചു. ചിലര്‍ ബ്ലോഗനുഭവങ്ങള്‍ ഹ്രസ്വമായി പങ്കുവെച്ചു. ഇടയ്‌ക്ക്‌ പാട്ടുപാടലും കവിത ചൊല്ലലും... അങ്ങനെ വിവിധയിനങ്ങള്‍.

ഇതിനിടയിലാണ്‌ വിനയ ചില അഭിപ്രായങ്ങള്‍ പറഞ്ഞത്‌. ഏതാനും ഫെമിനിസ്റ്റ്‌ അഭിപ്രായങ്ങള്‍. ഞാനിതിനോട്‌ ചെറുതായൊന്ന്‌ വിയോജിച്ചു സംസാരിച്ചു. ബാബുരാജും എന്റെ വാദത്തോടനുകൂലിച്ച്‌ സംസാരിച്ചു. അനില്‍ പറഞ്ഞു- നമ്മളൊരു സംവാദത്തിനല്ല ഇവിടെ വന്നിരിക്കുന്നത്‌; സൗഹൃദം പങ്കുവെക്കുന്നതിനാണ്‌; സംവാദം നമുക്ക്‌ ബ്ലോഗിലാകാം. വിനയ പിന്നീടൊരു അഭിപ്രായപ്രകടനംകൂടി നടത്തി. അനിലിന്റെ അഭിപ്രായം മാനിക്കണമല്ലോ. ഞാന്‍ വിഷയംവിട്ടു. (പിന്നീട്‌ ഞാന്‍ വിനയയെ കണ്ട്‌ സൗഹൃദത്തിലേര്‍പ്പെട്ട്‌ സംഗതി വിഷയമാക്കേണ്ടെന്നു സൂചിപ്പിച്ചു. നമ്മളെല്ലാം സംവദിക്കണമെന്നും സംവദിച്ചാലേ സൗഹൃദം വളരൂവെന്നും മറ്റും വിനയയും പറഞ്ഞു.)

ഇടയ്‌ക്ക്‌ കാപ്പിലാന്റെ നിഴല്‍ച്ചിത്രങ്ങള്‍ എന്ന പുസ്‌തകത്തിന്റെ പ്രദര്‍ശനവും വില്‍പനയും നടക്കുകയുണ്ടായി.

പരിചയപ്പെടലുകളും ഏതാനും ചെറിയ ചെറിയ കൂട്ടങ്ങളായുള്ള ചര്‍ച്ചകളും പങ്കുവെക്കലുകളും കഴിഞ്ഞ ശേഷം ഉച്ചഭക്ഷണത്തിനുള്ള സമയമായി. ബിരിയാണി വേണ്ടവര്‍ക്ക്‌ അത്‌. വേണ്ടെന്നുള്ളവര്‍ക്ക്‌ നാടന്‍ സദ്യയും. ഞാനും സുഹൃത്തും ബിരിയാണിയാണ്‌ തെരഞ്ഞെടുത്തത്‌. ഞങ്ങളുടെ നാട്ടിലുള്ളതില്‍നിന്ന്‌ വ്യത്യസ്‌തമായ രീതിയിലാണ്‌ ബിരിയാണിയാണിത്‌. ഇത്‌ തൊടുപുഴ ശൈലിയാണോ? അറിഞ്ഞുകൂടാ. ഏതായാലും അടിപൊളിയായിരുന്നു. ഊണിനുശേഷം ഐസ്‌ക്രീമും നുണഞ്ഞു.

ഭക്ഷണശേഷം ടൂറിസ്റ്റ്‌ ബസ്സില്‍ തൊമ്മന്‍കുത്തിലേക്ക്‌ യാത്ര. യാത്രക്കിടയിലും പാട്ടും കവിതയും തമാശകളും സ്ഥലവിവരണങ്ങളും തകര്‍ത്തുകൊണ്ടേയിരുന്നു.

തൊമ്മന്‍കുത്തിലെ മനോഹരമായ വെള്ളച്ചാട്ടങ്ങള്‍ കണ്ടശേഷം ഓഡിറ്റോറിയത്തിലേക്ക്‌ മടങ്ങിയ ഞങ്ങളെ തീറ്റിക്കാന്‍ കപ്പയും മുളകുചമ്മന്തിയും കട്ടന്‍കാപ്പിയും റെഡി. അതും മുടക്കിയില്ല.

എല്ലാം കഴിഞ്ഞ്‌ വൈകുന്നേരം 5.30 ന്‌ ഞങ്ങള്‍ പിരിഞ്ഞു, എല്ലാവര്‍ക്കും ഹൃദയപൂര്‍വ്വം നന്ദി പറഞ്ഞുകൊണ്ട്‌.

തൊടുപുഴ ബ്ലോഗേഴ്‌സ്‌ മീറ്റില്‍ പങ്കെടുത്തവര്‍:
(ഇംഗ്ലീഷ്‌ അക്ഷരമാലാ ക്രമത്തില്‍)

1. അനില്‍@ബ്ലോഗ്‌
2. അനൂപ്‌ കോതനല്ലൂര്‍
3. ബാബുരാജ്‌
4. ചാണക്യന്‍
5. ചാര്‍വാകന്‍
6. ധനേഷ്‌
7. ഹരീഷ്‌ തൊടുപുഴ, അദ്ദേഹത്തിന്റെ സ്‌റ്റാഫ്‌
8. അമ്മ തങ്കം
9. ഭാര്യ മഞ്‌ജുഷ
10. മകള്‍ ആവണി
11. കാന്താരിക്കുട്ടി
12. മകള്‍ റോഷ്‌നി
13. ലതി
14. മകന്‍ ബ്രഹ്‌്‌മദര്‍ശന്‍
15. മണികണ്‌ഠന്‍
16. മണി ഷാരത്ത്‌
17. മുരളിക
18. നാട്ടുകാരന്‍
19. ഭാര്യ നിഷ
20. നിരക്ഷരന്‍
21. പാവത്താന്‍
22. സമാന്തരന്‍
23. ശാര്‍ങ്‌ധരന്‍
24. ശിവ
25. ഭാര്യ സരിജ
26. സോജന്‍
27. സുനില്‍ കൃഷ്‌ണന്‍
28. typist | എഴുത്തുകാരി
29. മകള്‍ പ്രിയ
30. വഹാബ്‌
31. സുഹൃത്ത്‌ റാഷിക്‌
32. വിനയ

മേല്‍പ്പറഞ്ഞവരില്‍ ശാര്‍ങ്‌ധരന്റെ പേര്‌ സെര്‍ച്ച്‌ ചെയ്‌തിട്ടും ലിങ്കുകളൊന്നും കണ്ടെത്താനായില്ല. കൈവശമുള്ളവര്‍ അറിയിക്കുവാനപേക്ഷ. സോജന്റെ ലിങ്ക്‌ ശരിയാണോ എന്നതില്‍ സംശയമുണ്ട്‌. അതും ആരെങ്കിലും ഉറപ്പുവരുത്തിയാല്‍ നന്നായി. നാട്ടുകാരന്റെ ഭാര്യയുടെ പ്രൊഫൈലും ലഭിച്ചിട്ടില്ല. ഏതെങ്കിലും പ്രൊഫൈല്‍ ലിങ്കുകളില്‍ പിഴവുകളുണ്ടെങ്കില്‍ ചൂണ്ടിക്കാണിക്കുമല്ലോ?

തൊടുപുഴ മീറ്റിനെക്കുറിച്ചുള്ള മറ്റു പോസ്‌റ്റുകള്‍ ഇതുവരെ:-
1. http://kalyanasaugandikam.blogspot.com/2009/05/blog-post_25.html

2. http://kaappilaan.blogspot.com/2009/05/blog-post_24.html

3. http://maneezreview.blogspot.com/2009/05/thodupuzha-blog-meet.html

4. http://ormakall.blogspot.com/2009/05/blog-post_25.html

5. http://kerala2net.blogspot.com/2009/05/blog-post_25.html

6. http://aaltharablogs.blogspot.com/2009/05/blog-post_26.html

7. http://vakradrishti.blogspot.com/2009/05/blog-post_24.html

8. http://ezhuthulokam.blogspot.com/2009/05/blog-post_26.html

9.http://kannantechitralokam.blogspot.com/2009/05/blog-post_25.html

10. http://orumalayaliblogan.blogspot.com/2009/05/blog-post_27.html

11. http://chaanakyan.blogspot.com/2009/05/blog-post.html

12. http://paavathan.blogspot.com/2009/05/blog-post_27.html

13. http://entesrishty.blogspot.com/2009/05/blog-post_30.html
ഇനിയും പല പോസ്‌റ്റുകളും വരാനിരിക്കുന്നു.

ഈ പരിപാടിയില്‍ പങ്കെടുക്കാന്‍ കഴിയാത്ത പലരും ഇനിയും ഇത്തരം മീറ്റിംഗുകള്‍ നടത്തണമെന്ന്‌ ആവശ്യപ്പെട്ടുകൊണ്ടിരിക്കുന്നു. മീറ്റിംഗ്‌ നടത്തുന്നതിന്‌ പ്രശ്‌നമൊന്നുമില്ല. സാമ്പത്തികമാണ്‌ വിഷയം. ഈയൊരു പരിപാടിക്കുതന്നെ ഭീമമായ ഒരു സംഖ്യയാണ്‌ നമ്മുടെ ആതിഥേയന്‍ ചിലവഴിച്ചിരിക്കുന്നത്‌ എന്നത്‌ ഏതൊരാള്‍ക്കും മനസ്സിലാകും.

എല്ലാവര്‍ക്കും നന്ദി, പ്രത്യേകിച്ച്‌ ഞങ്ങളെ സ്‌നേഹത്തോടെ സ്വീകരിച്ച ഹരീഷ്‌, അവരുടെ കുടുംബം, സ്റ്റാഫ്‌... കൂടാതെ, ക്ഷണം സ്വീകരിക്കാന്‍ സന്‍മനസ്സ്‌ കാണിച്ച സഹബ്ലോഗര്‍മാര്‍.... എല്ലാവര്‍ക്കും.

ഇന്റര്‍നെറ്റിലെ മലയാളം ടി.വി.-ഒരു സംശയം

2009-03-16T10:44:00.000+05:30

പ്രിയപ്പെട്ട ബൂലോകരെ,
ഒരു സംശയം. ഇന്റര്‍നെറ്റില്‍ ലഭ്യമായ മലയാളം ടി.വി. ചാനലുകള്‍ ഏതൊക്കെയാണ്‌? ഇന്ത്യാവിഷനും മനോരമന്യൂസും മാത്രമാണ്‌ ഇപ്പോള്‍ ലഭ്യമാവുന്നതെന്നുതോന്നുന്നു. ഇവതന്നെ പൂര്‍ണ്ണമായും ലഭ്യവുമല്ല. മറ്റേതെങ്കിലും ഉണ്ടെങ്കില്‍ അറിയിക്കുവാനപേക്ഷ.

നടുക്കുന്ന ചില ദൃശ്യങ്ങള്‍ (ചൈനയില്‍ നിന്ന്‌)

2009-03-07T14:54:00.012+05:30

എനിക്ക്‌ ഇമെയിലില്‍ ലഭിച്ചതാണിത്‌. സത്യാവസ്ഥ അറിയില്ല.

സൂക്ഷിക്കുക ഇവര്‍ ആളെക്കൊല്ലും

2009-03-03T21:29:00.000+05:30

ഞാന്‍ ഇന്ന്‌ (മാര്‍ച്ച്‌ 3) കോഴിക്കോടിനടുത്ത രാമനാട്ടുകരയില്‍നിന്നും കോട്ടക്കലിനടുത്തുള്ള എടരിക്കോട്‌ വരെ ഒരു ബസ്സില്‍ യാത്ര ചെയ്‌തു.

കോഴിക്കോടുനിന്നും ഗുരുവായൂരിലേക്കു പോകുന്ന ബസ്സാണ്‌. പേര്‌ സഫാരി. നമ്പര്‍ KL11 U 3737. വൈകുന്നേരം 7 മണിക്ക്‌ കോട്ടക്കല്‍ ചങ്കുവെട്ടിയില്‍ എത്തുന്ന ബസ്സാണിത്‌. അമിതവേഗതയായിരുന്നു ബസിന്‌. ഇരമ്പിയാര്‍ത്ത്‌ പാഞ്ഞുകൊണ്ടിരുന്ന ബസിലിരുന്ന്‌ ഇതിനെതിരെ കണ്ടക്ടറോട്‌ പരാതിപ്പെട്ടു. ഫലമുണ്ടായില്ല. അയാള്‍ പറയുന്നത്‌ ഞങ്ങള്‍ക്ക്‌ റണ്ണിംഗ്‌ ടൈമിന്‌ ഓടിയെത്തണ്ടേ എന്നാണ്‌. കോഴിക്കോട്ടുനിന്നും കോട്ടക്കല്‍വരെയുള്ള റണ്ണിംഗ്‌ ടൈം അന്വേഷിച്ചപ്പോള്‍ 1 മണിക്കൂര്‍ 10 മിനിറ്റാണെന്നാണ്‌ അയാള്‍ പറഞ്ഞത്‌. എന്റെ കണക്കുപ്രകാരം മര്യാദ സ്‌പീഡില്‍ പോന്നാല്‍ തന്നെ എത്താവുന്ന സമയം. എന്നിട്ടുമെന്തിനാണീ മരണപ്പാച്ചിലെന്ന്‌ മനസ്സിലായില്ല. സംസാരിച്ചുകൊണ്ടിരിക്കുന്നതിനിടയില്‍ കണ്ടക്ടര്‍ മെല്ലെ ഒഴിഞ്ഞുമാറിപ്പോയി.

ഇറങ്ങാന്‍ നേരം ഡ്രൈവറോടും കാര്യം പറഞ്ഞു. ഈ ബസ്സിലെ ഡ്രൈവര്‍ ആരെയെങ്കിലും കൊന്നേ അടങ്ങൂ എന്ന്‌ എനിക്ക്‌ തോന്നുന്നു. അടുത്തുള്ള യാത്രക്കാരനുമായി ഈ വിഷയം സംസാരിച്ചപ്പോള്‍ അദ്ദേഹം പറഞ്ഞു- അമിതവേഗത കാരണം കോട്ടക്കല്‍ വെച്ച്‌ ഏതാനും പേര്‍ സംഘം ചേര്‍ന്ന്‌ മുന്നറിയിപ്പ്‌ നല്‍കിയ ബസാണിത്‌. അദ്ദേഹം ഇതുകൂടി പറഞ്ഞു- സ്വയം നന്നാകാന്‍ തീരുമാനിക്കാത്തവരെ നാട്ടുകാര്‍ നന്നാക്കാന്‍ ശ്രമിച്ചാലും ഒരുപരിധിവരെ നന്നാവില്ലെന്ന്‌.

വാഹനാപകടങ്ങള്‍ ഭീകരമാംവിധം ഉയരുകയാണ്‌ നമ്മുടെ നാട്ടില്‍. ഇക്കഴിഞ്ഞ ഒരാഴ്‌ചക്കിടയില്‍ എന്റെ നാട്ടില്‍, വൈലത്തൂരിനടുത്ത പൊന്‍മുണ്ടത്ത്‌ ഒരു ബൈക്കില്‍ പിക്കപ്പ്‌ വാന്‍ വന്നു കയറി ഒരു സ്‌ത്രീ ദാരുണമായി മരിക്കുകയുണ്ടായി. തലയിലൂടെ വാഹനത്തിന്റെ ചക്രം കയറിയാണ്‌ മരിച്ചത്‌.

വലിയൊരുപങ്കും അപകടങ്ങള്‍ ബൈക്കപകടങ്ങളാണ്‌. എന്റെ നാട്ടിലും പരിസരത്തുമായി ഈയിടെയായി നിരവധി ബൈക്കപകടങ്ങള്‍ നടക്കുകയുണ്ടായി. തല തകര്‍ന്നവര്‍, കൈകാലുകള്‍ തകര്‍ന്നവര്‍, മരിച്ചവര്‍ അങ്ങനെ പലരുമുണ്ടിക്കൂട്ടത്തില്‍.

ബ്ലോഗുകളില്‍ വാഹനാപകടങ്ങള്‍ ഒരു സജീവ ചര്‍ച്ചാവിഷയമല്ലെന്നാണ്‌ തോന്നുന്നത്‌. മനുഷ്യനെ നടുറോട്ടിലിട്ട്‌ ചമ്മന്തി പോലെ അരച്ചെടുക്കുന്ന ഈ ഏര്‍പ്പാട്‌ നമ്മുടെ സജീവ ചര്‍ച്ചാവിഷയമാകേണ്ടതാണ്‌.
താഴെ പറയുന്ന വിഷയങ്ങളെക്കുറിച്ച്‌ വിശദമായ ചര്‍ച്ച ആവശ്യമാണ്‌:
1. വാഹനാപകടങ്ങള്‍ എങ്ങനെ തടയാം?
2. അമിതവേഗതയിലോടുന്ന ബസുകളില്‍ യാത്രക്കാരെ സംഘടിതരാക്കുവാനുള്ള മാര്‍ഗ്ഗങ്ങള്‍.
3. മനുഷ്യസ്‌നേഹവും ദയയും ഡ്രൈവര്‍മാരുടെ മനസ്സില്‍ എങ്ങനെ ഊട്ടിയുറപ്പിക്കാം?
4. പോലീസിനെ വിവരം അറിയിക്കാനുള്ള മാര്‍ഗ്ഗങ്ങള്‍.
5. അമിതവേഗതയിലോടുന്ന ബസുകളിന്‍ മേല്‍ ബ്ലാക്ക്‌ലിസ്‌റ്റ്‌ ചെയ്‌തതായുള്ള സ്‌റ്റിക്കര്‍ പതിച്ചുകൂടേ? ഈ ബസ്സുകളില്‍ യാത്രക്കാര്‍ക്ക്‌ സംഘടിക്കാനും പ്രതികരിക്കാനും ഇത്‌ പ്രചോദനമാവും.
6. യാത്രക്കാര്‍ സംഘടിതരല്ലാത്തതാണ്‌ പലപ്പോഴും പ്രശ്‌നം.

ഇവനെയൊക്കെ എന്തു ചെയ്യണം...?

2009-02-24T10:32:00.002+05:30

ക്ലബിന്റെ പബ്ലിസിറ്റിക്കായ്‌ ഒരു ജനവഞ്ചന...!

2009-02-22T21:06:00.000+05:30

ഏകദേശം ഒരു മാസം മുമ്പ്‌ പ്രമുഖ പത്രങ്ങളിലെ ജില്ലാ പേജുകളിലും പ്രാദേശിക ടി.വി. ചാനലുകളിലും ഒരു ചെറിയ വാര്‍ത്താ ശകലം. ഒരു സ്വര്‍ണ്ണാഭരണം വീണുകിട്ടിയിരിക്കുന്നു എന്നും ഉടമസ്ഥര്‍ തെളിവുസഹിതം ബന്ധപ്പെടണമെന്നുമായിരുന്നു അറിയിപ്പ്‌. കൂടെ ഒരു ക്ലബിന്റെ പേരും, മൊബൈല്‍ നമ്പറുകളും ഉണ്ട്‌.
ക്ലബുമായി ബന്ധമുള്ള ചിലരില്‍നിന്നും ഈയിടെയാണ്‌ ആ രഹസ്യം അറിയാന്‍ കഴിഞ്ഞത്‌. സംഭവമിതാണ്‌-
വെള്ളച്ചാല്‍ (മലപ്പുറം ജില്ല, തിരൂര്‍ താലൂക്ക്‌, ഒഴൂര്‍ പഞ്ചായത്ത്‌) എന്ന സ്ഥലത്ത്‌ ഒരുകൂട്ടം ചെറുപ്പക്കാര്‍ ചേര്‍ന്ന്‌ പുതുതായി ഒരു ക്ലബ്‌ രൂപീകരിച്ചു. ക്ലബിന്റെ പബ്ലിസിറ്റിക്ക്‌ വേണ്ടിയായിരുന്നുവത്രെ അവരിങ്ങനെയൊരു റിപ്പോര്‍ട്ട്‌ മാധ്യമങ്ങള്‍ക്ക്‌ നല്‍കിയത്‌...!

എനിക്ക്‌ ഇമെയില്‍ ലോട്ടറിയടിച്ചു.....!!!!?

2009-02-19T10:52:00.002+05:30

പണത്തോട്‌ ആര്‍ത്തിയുള്ളവര്‍ വാങ്ങിക്കൊള്ളുക...!!

ഇംഗ്ലീഷ്‌ പഠിക്കുന്നവര്‍ക്കായി....

2009-02-18T21:57:00.001+05:30

ഇംഗ്ലീഷ്‌ പഠിക്കുന്നവര്‍ക്ക്‌ ഉപകാരപ്രദമായ, ഇംഗ്ലീഷ്‌ ലേഖനങ്ങള്‍ വായിക്കുവാനും ഒപ്പം കേള്‍ക്കാനും കഴിയുന്ന ഉപകാരപ്രദമായ ഒരു സൈറ്റ്‌. ഇംഗ്ലീഷ്‌ വായിക്കൂ... ഒപ്പം അവയുടെ ഉച്ഛാരണം എങ്ങനെയെന്നും കേള്‍ക്കൂ...
http://www.listen-to-english.com/

ഒരു മൂന്നാര്‍ യാത്രയുടെ ചിത്രങ്ങള്‍

2009-02-18T17:55:00.010+05:30

ഒരു മൂന്നാര്‍ യാത്രയുടെ ചിത്രങ്ങള്‍

വാഹനവായ്‌പയിലൂടെ കൊള്ളപ്പലിശ

2009-02-15T17:16:00.001+05:30

എന്റെ ഒരു സുഹൃത്ത്‌ HDFC ബാങ്ക്‌ ലോണ്‍ മുഖേന ഒരു ടൂവീലര്‍ വാങ്ങി. ഓരോ മാസവും 1350 രൂപ അടവ്‌. ഇതുവരെ കൃത്യമായി അടച്ചുവന്നിരുന്നു. ഈ മാസം അടവ്‌ രണ്ടു ദിവസം തെറ്റി. അതാ വരുന്നു... ഫൈന്‍ 450 രൂപ, പിന്നെ പലിശ 50 രൂപയും. ഇത്തരം ബാങ്കുവായ്‌പകളില്‍ കുടുങ്ങുന്നവര്‍ ഓര്‍ത്തിരിക്കുന്നത്‌ നല്ലതാണ്‌.

പോലീസും പണക്കാരും മാധ്യമങ്ങളും ചേര്‍ന്ന്‌ ഒരു സ്‌ത്രീയുടെ ജീവിതം നശിപ്പിക്കുന്നത്‌ എങ്ങനെ?

2009-02-11T11:03:00.006+05:30

കൊച്ചി സ്വേദിശിനി റഷീദ എന്ന സ്‌ത്രീയുടെ ഒരു ദുരനുഭവം ഈ ലക്കം (2009 ഫെബ്രുവരി) പച്ചക്കുതിര മാസികയില്‍ ചര്‍ച്ച ചെയ്യുന്നു. ഷിജു വട്ടോളിയാണ്‌ ലേഖനവും അഭിമുഖവും തയ്യാറാക്കിയത്‌.

പോലീസും പണക്കാരും മാധ്യമങ്ങളും ചേര്‍ന്ന്‌ ഒരു സ്‌ത്രീയുടെ ജീവിതം നശിപ്പിക്കുന്നത്‌ എങ്ങനെയെന്ന്‌ റിപ്പോര്‍ട്ടില്‍ വരച്ചുകാട്ടുന്നു.

റഷീദ കൊച്ചി സ്വദേശിയാണ്‌. ഭര്‍ത്താവ്‌ മരണപ്പെട്ടു. വീട്ടിലുള്ളത്‌ മകനും, രോഗിയായ ഉമ്മയും. നിത്യവൃത്തിക്കായി റഷീദ ഒരു സമ്പന്നന്റെ വീട്ടില്‍ ജോലിക്കു പോകുന്നു.
മറ്റു സ്‌ത്രീകള്‍ വീട്ടിലില്ലാത്ത ഒരു ദിവസം, ഗൃഹനാഥന്‍ റഷീദയെ കയറിപ്പിടിക്കാനൊരുങ്ങുന്നു. ദേഷ്യപ്പെട്ട അവര്‍ ചെരിപ്പൂരി മുതലാളിയെ അടിക്കുന്നു. അവരവിടെനിന്നും ഇറങ്ങിപ്പോന്നു.

പക മനസ്സില്‍ വെച്ച മുതലാളി, തന്റെ വീട്ടില്‍നിന്നും റഷീദ കുറേ സ്വര്‍ണ്ണം മോഷണം നടത്തിയിട്ടുണ്ടെന്ന്‌ , പോലീസിനെ സ്വാധീനിച്ച്‌ വ്യാജകേസുമായി രംഗത്ത്‌.

പോലീസ്‌ റഷീദയെ വിളിപ്പിച്ച്‌ ബുദ്ധിമുട്ടിച്ച്‌ ചോദ്യം ചെയ്യുകയും, വ്യാജകേസ്‌ ഫയല്‍ ചെയ്യുകയും ചെയ്യുന്നു. പത്രങ്ങളില്‍ വന്‍കവറേജോടെ വാര്‍ത്ത വന്നതോടെ അവര്‍ക്ക്‌ മാനം നഷ്ടപ്പെട്ടു. ഏറ്റവും പ്രചാരമുള്ള പത്രത്തില്‍ റിപ്പോര്‍ട്ട്‌: "കവര്‍ച്ച: വേലക്കാരിയും സഹായിയും അറസ്‌റ്റില്‍". സമൂഹത്തില്‍ നിന്നും പലരീതിയില്‍ ഒറ്റപ്പെടുത്തലുകള്‍. 9-ാം ക്ലാസില്‍ പഠിച്ചിരുന്ന മകന്‌ പഠനം നിര്‍ത്തേണ്ടിവന്നു. വിഷയം, ദേശീയ ഗാര്‍ഹിക തൊഴിലാളി സംഘടനയുടെ ശ്രദ്ധയില്‍പ്പെടുകയും അവരിടപെടുകയും ചെയ്‌തതോടെയാണ്‌ അല്‍പമെങ്കിലും ആശ്വാസമായത്‌.
എന്നാല്‍ റഷീദ നിരപരാധിയാണെന്ന കോടതിവിധി വന്നതിനു ശേഷം അവര്‍ വിളിച്ചുചേര്‍ത്ത പത്രസമ്മേളനത്തില്‍ പറഞ്ഞ കാര്യങ്ങള്‍ വേണ്ടവിധത്തില്‍ പ്രസിദ്ധീകരിക്കാന്‍ നമ്മുടെ മാധ്യമങ്ങള്‍ക്ക്‌ കഴിഞ്ഞില്ല. "പോലീസിനെതിരെ പരാതിയുമായി ഫോര്‍ട്ട്‌ കൊച്ചി സ്വദേശിയായ സ്‌ത്രീ" എന്ന രീതിയില്‍ വാര്‍ത്തയെ അവര്‍ ഒതുക്കി. വ്യക്തമായ കോടതിവിധിയുടെ പകര്‍പ്പുകളുടെ ആധികാരികതയോടെ വിവരിക്കപ്പെട്ട ഒരു നിരാലംബയായ സ്‌ത്രീയുടെ ദുരനുഭവം വെളിച്ചത്തുകൊണ്ടുവരാന്‍ മാധ്യമപ്രവര്‍ത്തകര്‍ താല്‍പര്യം കാണിച്ചില്ല എന്നതാണ്‌ ഇതില്‍ ഏറെ ഞെട്ടലുണ്ടാക്കുന്നത്‌.

ഒരു കാര്യം സൂചിപ്പിക്കട്ടെ: പച്ചക്കുതിര ശബ്ദമില്ലാത്തവന്റെ ശബ്ദമാണ്‌. നീതിയോട്‌ താല്‍പര്യമുള്ളവര്‍ ഇത്തരം പത്ര-പ്രസിദ്ധീകരണങ്ങളെ പിന്തുണക്കേണ്ടതുണ്ട്‌.

ഇംഗ്ലീഷ്‌ ലാംഗ്വേജ്‌ ഡവലപ്‌മെന്റ്‌ ചാറ്റ്‌

2009-02-06T17:12:00.000+05:30

എനിക്കും മറ്റുള്ളവര്‍ക്കും ഇംഗ്ലീഷ്‌ ഭാഷ ഡവലപ്‌ ചെയ്യുന്നതിന്‌ ഞാനുമായി ഗൂഗിള്‍ ടോക്ക്‌ (അല്ലെങ്കില്‍ ജിമെയില്‍) വഴി ചാറ്റ്‌ ചെയ്യാന്‍ താല്‍പര്യമുള്ളവര്‍ vahabvailathur@gmail.com എന്ന വിലാസത്തില്‍ ബന്ധപ്പെട്ടാലും.....!

ഒരു കാലിക്കറ്റ്‌ യൂണിവേഴ്‌സിറ്റിത്തെറ്റ്‌

2009-02-03T09:44:00.003+05:30

യൂണിവേഴ്‌സിറ്റിയുടേതൊക്കെ ആവുമ്പോള്‍, കാര്യങ്ങള്‍ വിവരമുള്ളവര്‍ കൈകാര്യം ചെയ്യുമെന്നാണ്‌ വെപ്പ്‌. എന്നാല്‍ കാലിക്കറ്റ്‌ യൂണിവേഴ്‌സിറ്റി വെബ്‌സൈറ്റില്‍ നോക്കൂ... Colleges എന്നതിനു പകരം Collages എന്നു കൊടുത്തിരിക്കുന്നു.....! പതിനായിരക്കണക്കിന്‌ വിദ്യാര്‍ത്ഥികള്‍ ദിനേനയെന്നോണം കയറിയിറങ്ങുന്ന ഒരു സൈറ്റാണിതെന്നോര്‍ക്കുക..!

ശനിയാഴ്‌ചയുടെ സുഖം

2009-01-17T21:34:00.002+05:30

നാളെ ഞായറാഴ്‌ച. ഒഴിവുദിനം. ഈ ആശ്വാസമാണ്‌ ശനിയാഴ്‌ചയുടെ രസം. പ്രത്യേകിച്ചും ശനിയാഴ്‌ചയുടെ വൈകുന്നേരങ്ങളില്‍. ഈദിനത്തില്‍ ഹാവൂ.... എന്നൊന്നു നെടുവീര്‍പ്പിടുന്നവര്‍ നിരവധിയാണ്‌. വിദ്യാര്‍ത്ഥികള്‍, ജോലിക്കാര്‍, ബിസിനസുകാര്‍.....! അങ്ങനെ പലരും.
ബീച്ചില്‍ പോകാന്‍ പ്ലാന്‍ ചെയ്‌തവര്‍. അതുപോലെ മറ്റു യാത്രകള്‍ പ്ലാന്‍ ചെയ്‌തവര്‍....! കുടുംബത്തിലോ സുഹൃത്തിന്റെയോ കല്യാണത്തിന്‌ പോകുന്നതാലോചിക്കുമ്പോഴുള്ള സന്തോഷം.... ഇതൊക്കെ ശനിയാഴ്‌ചയുടെ പ്രത്യേകതയാണ്‌.
ചിലപ്പോള്‍ കുടുംബത്തോടൊപ്പം കളിച്ചും ചിരിച്ചും വീട്ടില്‍കൂടാനുള്ള അവസരവുമാകാറുണ്ട്‌ ഞായറാഴ്‌ച.
മിക്കവാറും എല്ലാ ഞായറാഴ്‌ചകളിലും ബീച്ചില്‍ പോകുന്നവര്‍ ഇപ്പോള്‍ ഇപ്പോള്‍ കൂടിവരികയാണെന്നു തോന്നുന്നു. കോഴിക്കോട്‌ ബീച്ചില്‍ ഞായറാഴ്‌ച വൈകുന്നേരം പോയാലിതറിയാം. തിരക്ക്‌ ദിനംപ്രതി ഏറിവരികയാണ്‌.
ഞായറാഴ്‌ച രാത്രി അല്‍പ്പം കടുത്തതാണ്‌. നഷ്ടമായ ഒരൊഴിവുദിനത്തിന്റെയും, മുന്നില്‍ വന്നുനില്‍ക്കുന്ന, തിരക്കുകളുടെ ദിനമായ തിങ്കളാഴ്‌ചയുടെയും കനത്ത മുഖം...!

പുസ്‌തകങ്ങളുടെ പൊള്ളുന്ന വില

2008-11-28T20:58:00.001+05:30

പുസ്‌തകങ്ങളുടെ വന്‍വില കാരണം സാധാരണക്കാരന്‌ ഇന്ന്‌ പുസ്‌തകങ്ങള്‍ അപ്രാപ്യമായിക്കൊണ്ടിരിക്കുകയാണ്‌. ഡി.സി. ബുക്‌സ്‌, പെന്‍ ബുക്‌സ്‌ തുടങ്ങിയ മുന്‍നിര പ്രസാധകര്‍ വിലയുടെ കാര്യത്തിലും മുന്‍പന്തിയിലാണ്‌. ഇവരുടെ ചില പുസ്‌തകങ്ങളുടെ ഫോട്ടോസ്റ്റാറ്റ്‌ കോപ്പിയെടുത്താല്‍ പോലും പുസ്‌തകങ്ങള്‍ വിലകൊടുത്തുവാങ്ങുന്നയത്ര ചെലവുവരുന്നില്ല! ഡി.സി. ബുക്‌സിന്റെ ലോകരാഷ്‌ട്രങ്ങള്‍ എന്ന പുസ്‌തകത്തിന്റെ മുഖവില 2500 രൂപയാണ്‌. ഈ പുസ്‌തകം പ്രീ-പബ്ലിക്കേഷനില്‍ നല്‍കുന്നത്‌ 1500 രൂപക്കും. ആയിരം രൂപയുടെ വ്യത്യാസം. അങ്ങിനെയാണെങ്കില്‍ പ്രസാധകരുടെ ലാഭം എത്രയാണ്‌? മാത്രവുമല്ല, പ്രീപബ്ലിക്കേഷനില്‍ വാങ്ങാന്‍ കഴിയാത്തവര്‍ ഈ പുസ്‌തകം ആയിരം രൂപ കൂടുതല്‍ നല്‍കി പിന്നീട്‌ വാങ്ങണം. പ്രീ-പബ്ലിക്കേഷനില്‍ വാങ്ങാത്തവര്‍ പിന്നീട്‌ പുസ്‌തകം വാങ്ങേണ്ടതില്ല, വാങ്ങുന്നുണ്ടെങ്കില്‍ തന്നെ അവരെ അമിതമായി ചൂഷണം ചെയ്യണം എന്ന വാശികൂടി ഇതിലടങ്ങിയിട്ടുണ്ടെന്നു തോന്നിപ്പോകുന്നു.

സി.ഡി., ഇന്റര്‍നെറ്റ്‌, ഇ.ബുക്ക്‌, തുടങ്ങിയ ഇലക്‌ട്രോണിക്‌ മാധ്യമങ്ങളുടെ കടന്നുകയറ്റം നടന്നുകൊണ്ടിരിക്കുന്ന വായനാലോകത്ത്‌ പുസ്‌തകങ്ങളുടെ പൊള്ളുന്ന വില കൂടിയാവുമ്പോള്‍ പുസ്‌തകപ്രസാധന മേഖല അപ്പാടെ അസ്‌തമിക്കുകയാവും ഫലം. ഇക്കാര്യം മനസ്സിലാക്കുവാന്‍ പ്രസാധകര്‍ തയ്യാറാകണമെന്നപേക്ഷിക്കുന്നു.

NB: ഞാന്‍ ഒരു ഡി.സി. ബുക്‌സ്‌ വിരോധിയല്ല, മറിച്ച്‌ അവരുടെ സ്ഥിരം കസ്‌റ്റമര്‍ കൂടിയാണ്‌. ഡി.സി. ബുക്‌സിന്റെ വി.ഐ.പി. ഗോള്‍ഡ്‌ അംഗത്വമുണ്ട്‌. പച്ചക്കുതിര മാസികയുടെ വരിക്കാരനുമാണ്‌.

ചില മാതൃഭൂമിക്കഥകള്‍

2008-11-21T22:05:00.000+05:30

ഞാന്‍ മാധ്യമ വിശേഷം എന്നൊരു ബ്ലോഗ്‌ തുടങ്ങിയിരിക്കുന്നു. ഇതാ ലിങ്ക്‌: http://www.madhyamavishesham.blogspot.com/

ക്രിക്കറ്റ്‌ എന്ന കിറുക്ക്‌

2008-11-14T22:06:00.000+05:30

ക്രിക്കറ്റ്‌ എന്ന കളിയെ വെറുക്കുന്ന ഒരു വ്യക്തിയാണ്‌ ഞാന്‍. മണിക്കൂറുകള്‍ നീളുന്ന കളിയാണിത്‌. കളി വിട്ട്‌ കാര്യത്തിലേക്ക്‌ കടക്കുന്ന കളി. മനുഷ്യന്റെ എത്ര വിലപ്പെട്ട സമയമാണ്‌ ഈ കളി നഷ്ടപ്പെടുത്തുന്നത്‌?

പണമുള്ളവന്‌ കളിക്കാം. കളി കാണാം. അവന്‌ വേറെ ഒന്നും ചിന്തിക്കാനില്ല. പക്ഷേ, ചില സാധുക്കളുണ്ട്‌ ഈ കളിക്ക്‌ പിന്നാലെ പായുന്നവരില്‍. ജോലിയെടുത്ത്‌ വൈകുന്നേരമാവുമ്പോഴേക്ക്‌ അന്നത്തേക്ക്‌ ജീവിക്കാനുള്ള വകയൊപ്പിക്കേണ്ടവര്‍. ഈ മരമണ്ടന്മാര്‍ കിട്ടുന്ന നേരം ടി.വി.ക്ക്‌ മുമ്പിലിരുന്ന്‌ ക്രിക്കറ്റും കണ്ട്‌ കാലിപ്പോക്കറ്റുമായി വീട്ടില്‍ തിരിച്ചെത്തുന്നു, അതും നട്ടപ്പാതിരക്ക്‌.

പഠനവും പരീക്ഷയും മാറ്റിവെച്ച്‌ ക്രിക്കറ്റ്‌ ഭ്രാന്ത്‌ പിടിപെട്ട വിദ്യാര്‍ത്ഥികളെയും നമുക്ക്‌ കാണാനാകുന്നു.

ഇവര്‍ക്കൊക്കെ എന്ന്‌ ബോധമുദിക്കും?

ചാനലുകാര്‍ക്കും കളിക്കാര്‍ക്കുമൊക്കെ പണക്കൊയ്‌ത്താണ്‌. ഈ കണ്ടിരിക്കുന്നവര്‍ക്കെന്ത്‌ കിട്ടാനാണ്‌?

ഫുട്‌ബോള്‍ സഹിക്കാം. കാരണം രണ്ടോ മൂന്നോ മണിക്കൂര്‍ മാത്രം. കളിയുടെ പരിധി വിടാത്ത കളി. ക്രിക്കറ്റോ?

ക്രിക്കറ്റ്‌ നിരോധിച്ചാല്‍ കുറേ സാധു മനുഷ്യര്‍ രക്ഷപ്പെടും. പക്ഷേ നടക്കില്ല. പലരുടെയും പോക്കറ്റിലേക്കുള്ള വരവ്‌ നിലയ്‌ക്കും.

ഐ.എസ്‌.എം. മലയാളം ടൈപ്പിംഗ്‌ പാഠം-1

2008-10-24T10:59:00.001+05:30

ഐ.എസ്‌.എം. സോഫ്‌റ്റ്‌വെയര്‍ കീകള്‍ ഉപയോഗിച്ച്‌ മലയാളം ടൈപ്പ്‌ ചെയ്യുവാന്‍ പലരും താല്‍പര്യം പ്രകടിപ്പിക്കാറുണ്ട്‌.

Typeit എന്ന സോഫ്‌റ്റ്‌ വെയര്‍ ഉപയോഗിച്ച്‌ ടൈപ്പ്‌ ചെയ്യുന്ന രീതിയാണ്‌ ഇവിടെ പറയുന്നത്‌.
1. http://www.softpedia.com/get/Office-tools/Text-editors/Typeit.shtml എന്ന ലിങ്കില്‍ നിന്നും ടൈപ്പിറ്റ്‌ ഡൗണ്‍ലോഡ്‌ ചെയ്യാം.
2. ടൈപ്പിറ്റ്‌ ഇന്‍സ്റ്റാള്‍ ചെയ്യുക.
3. Tools > Keyboard > Inscript ആണ്‌ സെറ്റിംഗ്‌ എന്ന്‌ ഉറപ്പുവരുത്തുക

ഇനി ടൈപ്പ്‌ ചെയ്‌തു തുടങ്ങാം
ഓരോ പ്രാവശ്യവും capslock പ്രസ്സു ചെയ്യുന്നതിനനുസരിച്ച്‌ മലയാളവും ഇംഗ്ലീഷും മാറിമാറിവരും.
1. ആദ്യമായി നാം ടൈപ്പ്‌ ചെയ്യുന്ന വാക്ക്‌: മലയാളം.

caps lock അമര്‍ത്തി മലയാളത്തില്‍ നിര്‍ത്തിയ ശേഷം താഴെ അക്ഷരങ്ങള്‍ ടൈപ്പുചെയ്‌തുനോക്കൂ...
cn/eNx
സി, എന്‍, ബാര്‍, ഇ, ഷിഫ്‌റ്റ്‌ എന്‍, എക്‌സ്‌ എന്നീ അക്ഷരങ്ങള്‍ ഇവിടെ ഉപയോഗിച്ചിരിക്കുന്നു.

ഏതൊരു അക്ഷരത്തിന്റെയും 'ാ' കാരം ലഭിക്കുന്നതിന്‌ e എന്ന അക്ഷരമാണ്‌ ഉപയോഗിക്കേണ്ടത്‌.
വിവിധ അക്ഷരങ്ങള്‍ പരീക്ഷിച്ചുനോക്കുക.
ഉദാ:- മാ (ce), പാ(he), കാ (ke)
ഏതൊരു അക്ഷരത്തിന്റെയും 'ം' രൂപം ലഭിക്കുന്നതിന്‌ x ഉപയോഗിക്കുക.
മം (cx), ലം (nx), യം (/x)
ഇനി ഫയല്‍ സേവ്‌ ചെയ്യാം.
------------------------------------------
ബ്ലോഗുകളിലും മറ്റും യൂണികോഡ്‌ ആയി ഇവ പേസ്റ്റ്‌ ചെയ്യുന്നതിന്‌
1. മെനുവിലെ convert> to unicode കൊടുക്കുക.
2. ഇപ്പോള്‍ ഇന്റര്‍നെറ്റ്‌ എക്‌സ്‌പ്ലോററില്‍ ഈ ടെക്‌സ്‌റ്റുകള്‍ വന്നുനില്‍ക്കും.
3. എക്‌സ്‌പ്ലോററിലെ ഈ ടെക്‌സ്‌റ്റ്‌ കോപ്പി ചെയ്‌ത്‌ ബ്ലോഗുകളിലേക്കും വെബ്‌പേജുകളിലേക്കും പേസ്റ്റ്‌്‌ ചെയ്യാം.
--------------------------------------

(തുടരും)

ആശീര്‍വ്വദിക്കൂ, ഈ പുതിയ ബ്ലോഗറെ....

2008-08-04T12:38:00.000+05:30

മലപ്പുറം ബ്ലോഗ്‌ ശില്‍പ്പശാലയില്‍ പങ്കെടുത്ത പ്രദീപ്‌ പേരശന്നൂര് ‍ബ്ലോഗ്‌ തുടങ്ങിയിരിക്കുന്നു. http://pradeepperassannur.blogspot.com/

വായിച്ച്‌ അഭിപ്രായങ്ങള്‍ രേഖപ്പെടുത്തി സഹകരിക്കുവാന്‍ എല്ലാ ബൂലോഗരോടും വിനയപൂര്‍വ്വം അഭ്യര്‍ത്ഥിക്കുന്നു.

മരണക്കത്തിന്റെ പൊല്ലാപ്പും പ്രസ്സുകാരും

2008-08-04T08:24:00.002+05:30

പ്രസ്സുകാരായ ഞങ്ങള്‍ക്ക്‌ പേടിസ്വപ്‌നമായ ഒരു സംഗതിയുണ്ട്‌. മരണക്കത്ത്‌ എന്നാണിവന്‌ പറയുക. രാത്രിയില്‍ സുഖമായുറങ്ങുമ്പോഴോ, രാവിലെ പ്രാഥമിക കൃത്യങ്ങള്‍ നടത്താനിരിക്കുമ്പോഴോ പലപ്പോഴും ഇവന്‍ വന്നു കയറിയാലാണ്‌ വല്യ ശല്യമാവുക. അസമയങ്ങളില്‍ ഫോണ്‍ റിംഗ്‌ ചെയ്യുന്നുണ്ടെങ്കില്‍ മിക്കവാറും ഒന്നുറപ്പിക്കാം- ആരോ മരിച്ചിട്ടുണ്ട്‌.
നമ്മുടെ ഫോണ്‍ ഓഫായിക്കിടക്കുകയോ, നമ്പര്‍ ലഭ്യമല്ലാതിരിക്കുകയോ ചെയ്‌താല്‍ അതിനേക്കാള്‍ വലിയ പൊല്ലാപ്പാണ്‌. ശല്യം നേരിട്ട്‌ വീട്ടിലെത്തും. പ്രസ്സിനടുത്ത്‌, ടൗണില്‍ തന്നെ വീടായതിനാല്‍ എനിക്ക്‌ മിക്കപ്പോഴും ഇത്തരം അനുഭവങ്ങളുണ്ടായിട്ടുണ്ട്‌.
മുസ്‌്‌ലിംകളില്‍ ഒരാള്‍ മരിച്ചാല്‍ അയാളുടെ പേരില്‍ പള്ളികളില്‍ പ്രാര്‍ത്ഥന നടത്തുന്നതിനും മയ്യിത്ത്‌ നിസ്‌കരിക്കുന്നതിനും വേണ്ടി തയ്യാറാക്കുന്ന കത്താണ്‌ മരണക്കത്ത്‌. മരിച്ചകത്ത്‌്‌ എന്നും പറയും. ഈ സാധനത്തിന്‌ ഒരു നല്ല പേരില്ലെന്നാണ്‌ തോന്നുന്നത്‌.
ഒരാള്‍ മരിച്ചാല്‍ ബന്ധുക്കള്‍ ഉടനെ പ്രസ്സുകാരനെ തേടിയെത്തും- മരണക്കത്തടിക്കാന്‍. സംസ്‌കാരത്തിനായി പള്ളിയിലേക്ക്‌ കൊണ്ടുപോകുന്നതിന്‌, വീട്ടില്‍ നിന്നെടുക്കുന്നന്നതിനു മുമ്പായി (മയ്യിത്തെടുക്കുന്നതിന്‌ മുമ്പായി) ഈ കത്ത്‌ അടിച്ചുകൊടുക്കണം.
മയ്യിത്ത്‌ സന്ദര്‍ശിക്കുന്നവര്‍ ഇത്‌ അവരവരുടെ നാട്ടിലെ പള്ളികളിലെത്തിക്കും. ഇതാണ്‌ രീതി. പണ്ട്‌ ലറ്റര്‍ പ്രസ്സുകാര്‍ ഈ കത്ത്‌ ഇന്‍ലന്റ്‌ രൂപത്തിലുള്ള കത്തിലാണ്‌ അടിച്ചുകൊടുത്തിരുന്നത്‌. കറന്റ്‌ ഇല്ലാതെയും കാല്‍ കൊണ്ട്‌ ചവിട്ടി പ്രവര്‍ത്തിപ്പിക്കാവുന്ന പഴയകാല ലെറ്റര്‍ പ്രസ്സുകള്‍ ഇപ്പോള്‍ മിക്കയിടത്തും ഓര്‍മ്മ മാത്രമായി. ഇപ്പോള്‍ ഓഫ്‌സെറ്റ്‌ പ്രസ്സുകളുടെ യുഗമായി.
പ്രിന്റിംഗ്‌ വേഗത്തിലായി എന്ന്‌ അഭിമാനിക്കാമെങ്കിലും നിമിഷങ്ങള്‍ കൊണ്ട്‌ മരണക്കത്തടിക്കുക എന്നത്‌ പ്രയാസകരമായ കാര്യമാണ്‌. കാരണം ഡി.ടി.പി. എടുക്കണം. ഇന്‍ലന്റ്‌ സ്റ്റോക്ക്‌ ചെയ്യണം. മെഷീനില്‍ മാസ്‌റ്റര്‍ ഫിറ്റു ചെയ്യണം. പ്രിന്റിംഗില്‍ സഹായിക്കാന്‍ ചെയ്യാന്‍ ഒരാളും വേണം. അസമയങ്ങളിലായിരിക്കും പലപ്പോഴും ഓര്‍ഡര്‍ വരുന്നത്‌. കറന്റ്‌ പോയാല്‍ കട്ടപ്പുകയുമായി. ഇക്കാരണങ്ങളാല്‍ ഡി.ടി.പി.യും ഫോട്ടോസ്‌റ്റാറ്റുമെടുത്ത്‌ കവറിലിട്ടുകൊടുക്കുകയാണിപ്പോള്‍ ചെയ്യുന്നത്‌. ഏറ്റവും എളുപ്പമായ മാര്‍ഗ്ഗം.
എന്നാല്‍ ഇന്‍ലന്റ്‌ കത്ത്‌ കണ്ട്‌ ശീലിച്ച (പ്രത്യേകിച്ചും പ്രായമായവര്‍ക്ക്‌്‌) ചിലര്‍ക്ക്‌ ഇത്‌ പിടിക്കില്ല. അവര്‍ ഇന്‍ലന്റ്‌കത്തടിക്കുന്ന ഇടം തേടിപ്പോകും. പലരും ഇങ്ങനെയെങ്കില്‍ ഇങ്ങനെ എന്നും പറഞ്ഞ്‌ തിരിച്ചുംവരും.
ഇന്‍ലന്റ്‌ മോഡലില്‍ തന്നെ വേണമെന്ന്‌ വാശിപിടിക്കുന്നതിന്റെ വിഡ്‌ഢിത്തമോര്‍ത്താല്‍ കൗതുകം തോന്നും. കാരണം ഈ സാധനം കൊണ്ടുപോയി പള്ളിയിലെ മിമ്പറില്‍ കൊണ്ടുപോയിടും. ഇമാമോ ഖത്തീബോ മയ്യിത്ത്‌ നിസ്‌കാരത്തിന്‌ മുമ്പായി ഇതെടുത്ത്‌ പേരൊന്ന്‌ വായിക്കും. ഈ ആവശ്യത്തിന്‌ ഡി.ടി.പി.-ഫോട്ടോസ്‌റ്റാറ്റ്‌ മോഡല്‍ തന്നെ ധാരാളം.
മാന്യമഹാജനങ്ങളേ, അതുകൊണ്ട്‌ ആര്‍ക്കെങ്കിലും മരണക്കത്തടിക്കണമെങ്കില്‍ രാവിലെ 8.30ന്‌ വന്നാല്‍ മതി. 10 മിനിറ്റു കൊണ്ട്‌ ഡി.ടി.പി. എടുത്ത്‌, ഫോട്ടോസ്‌റ്റാറ്റുമെടുത്ത്‌്‌ ഏതാനും നിമിഷങ്ങള്‍ കൊണ്ട്‌ പരിപാടി തീര്‍ക്കാം. ഫോട്ടോസ്‌റ്റാറ്റ്‌ ഷോപ്പ്‌ തുറക്കാന്‍ രാവിലെ എട്ടര കഴിയും.
മരണക്കത്തിന്‌ അഡ്വാന്‍സ്‌ പലപ്പോഴും ചോദിക്കാന്‍ തോന്നില്ല. കാരണം മരണം മൂലമുള്ള സഹതാപ സാഹചര്യം. കണ്ടറിഞ്ഞ്‌ തരുന്ന നല്ലമനുഷ്യരുണ്ട്‌.അഡ്വാന്‍സ്‌ വാങ്ങാത്തതിന്റെ ചൂട്‌ ഒരിക്കലനുഭവിച്ചു. പണ്ടൊരു ടീം മരണത്തടിക്കാന്‍ പറഞ്ഞ്‌ എന്നെ വീട്ടില്‍നിന്നിറക്കിക്കൊണ്ടുവന്ന്‌ തുറപ്പിച്ചു. ഞാന്‍ ഡി.ടി.പി. ചെയ്‌ത ശേഷം, ഫോട്ടോസ്‌റ്റാറ്റെടുക്കാനായി പോയി. തിരിച്ചുവന്നപ്പോഴേക്കും കക്ഷികളെ കാണാനില്ല. ഡി.ടി.പി. മോഡല്‍ പറ്റുമോ എന്ന സംശയം പിടികൂടിയതിനാല്‍ പറ്റാത്തതുകൊണ്ട്‌ ഊരിയതായിരിക്കാനാണ്‌ സാധ്യത.
എനിക്കും വാശിയായി. സമീപത്തുള്ള അരീക്കാട്‌ പ്രദേശത്താണ്‌ മരണം നടന്നത്‌ എന്ന്‌ കത്തില്‍നിന്ന്‌ മനസ്സിലായിരുന്നു. ഞാനും പാര്‍ട്‌ണര്‍ മുഷ്‌താഖലിയും കൂടി ബൈക്കില്‍ നേരെ അരീക്കാട്ടേക്ക്‌ വിട്ടു. മരിച്ചവീടന്വേഷിച്ചപ്പോള്‍ പെട്ടെന്ന്‌ കണ്ടെത്താനായി. അവിടെചെന്നു. കത്തടിക്കാന്‍ ഏല്‍പ്പിച്ചവര്‍ അപ്പോള്‍ അവിടെയില്ല. അവിടെ ഉത്തരവാദിത്തപ്പെട്ടഒരാളെ കത്തേല്‍പ്പിച്ച്‌ കാശും വാങ്ങി ഞങ്ങള്‍ സ്ഥലംവിട്ടു. കത്തേല്‍പ്പിച്ച 'മാന്യന്മാര്‍' പിന്നീടിതറിഞ്ഞിരിക്കണം.

കെ.എസ്‌.ഇ.ബി. ഷോക്കടിപ്പിക്കുന്നു

2008-08-01T11:14:00.002+05:30

ഇതെന്താണപ്പാ?
ഈ മാസം കറന്റ്‌ ബില്ലിന്‌ പുറമെ ഇതുംഅടക്കണംത്രേ?
ജീവിക്കാന്‍ സമ്മതിക്കൂല.എന്റെ സുഹൃത്ത്‌ റസാഖ്‌ പറമ്പിന്‍മുകള്‍
ഇന്ന്‌്‌ രാവിലെത്തന്നെ പായ്യേരം പറഞ്ഞ്‌ ഓടിവന്നു കാണിച്ചു
തന്ന ബില്ലിന്റെ കോപ്പിയാണിത്‌.

റോഡ്‌ തടഞ്ഞാല്‍ പ്രശ്‌നപരിഹാരമാവുമോ?

2008-07-20T08:36:00.001+05:30

മുകളില്‍ കാണുന്നത്‌ - ഒരു റോഡ്‌ തടയല്‍ പിക്കറ്റിങ്ങിന്റെ ചിത്രം ഇന്ന്‌ പത്രത്തില്‍ വന്നത്‌.
പാര്‍ട്ടികള്‍ ഏതാകട്ടെ, ഇത്തരം സമരങ്ങള്‍ കൊണ്ട്‌ ബുദ്ധിമുട്ടുന്ന ജനങ്ങളെത്രയാണ്‌? ഈ സമരം കൊണ്ട്‌ വല്ല ഉപകാരവുമുണ്ടോ? ഉപദ്രവമല്ലാതെ......?

പ്രിന്റര്‍ ടോണര്‍ റീഫില്ലിംഗ്‌

2008-07-19T07:43:00.001+05:30

എച്ച്‌.പി. ലേസര്‍ പ്രിന്ററിന്റെ കാട്രിഡ്‌ജില്‍ നമുക്ക്‌

സ്വന്തമായി ടോണര്‍ റീഫില്‍ ചെയ്യാന്‍ സാധിക്കുമോ?

ഇതുസംബന്ധമായി അറിവുള്ളവര്‍ വല്ലവരും വിവരം

തന്നാല്‍ ഉപകാരമായി. ഞാനിപ്പോള്‍ പുറത്തുനിന്ന്‌ റീഫില്‍

ചെയ്യിക്കുകയാണ്‌. ഇതു സംബന്ധമായ അറിവു നല്‍കുന്ന

ഒരു നല്ല വെബ്‌സൈറ്റ്‌?

മലപ്പുറം ശില്‍പ്പശാലയും മാധ്യമങ്ങളും

2008-07-15T18:16:00.002+05:30

കേരള ബ്ലോഗ്‌ അക്കാദമി 2008 ജൂലൈ 13-ന്‌ സംഘടിപ്പിച്ച മലപ്പുറം
ബ്ലോഗ്‌ ശില്‍പ്പശാലയുടെ റിപ്പോര്‍ട്ടുകള്‍ പത്രങ്ങള്‍ വളരെ
പ്രാധാന്യത്തോടെയാണ്‌ പ്രസിദ്ധീകരിച്ചത്‌. മൂന്ന്‌ ഘട്ടങ്ങളിലായാണ്‌
പത്രങ്ങളില്‍ വാര്‍ത്ത വന്നത്‌- 1) റിപ്പോര്‍ട്ടുകള്‍ ആദ്യമായി
പത്രഓഫീസുകളിലെത്തിച്ചപ്പോള്‍ 2) പത്രസമ്മേളനത്തിനു ശേഷം
3) പരിപാടി കഴിഞ്ഞതിനു ശേഷം. ഈ മൂന്നു ഘട്ടങ്ങളിലും
റിപ്പോര്‍ട്ടുകള്‍ നല്‍കാതെ മാറി നിന്നത്‌ ഒരു പത്രം മാത്രം- മാധ്യമം.
മാധ്യമം മാത്രം വായിക്കുന്ന നിര്‍ഭാഗ്യവാന്മാര്‍ വല്ലവരുമുണ്ടെങ്കില്‍
അവര്‍ക്ക്‌ ഞങ്ങളുടെ ആദരാഞ്‌ജലികള്‍ അര്‍പ്പിച്ചുകൊള്ളുന്നു.
ബ്ലോഗ്‌ ശില്‍പ്പശാല ഒരു വന്‍വിജയമാക്കിയ കേരള ബ്ലോഗ്‌
അക്കാദമിയുടെ അണിയറ ശില്‍പ്പികള്‍, ബ്ലോഗാര്‍ത്ഥികള്‍,
പ്രമുഖ ബ്ലോഗര്‍മാര്‍, പത്രമാധ്യമങ്ങള്‍ എന്നിവക്കെല്ലാം
ഹൃദയപൂര്‍വ്വം കൃതഞ്‌ജത അറിയിക്കട്ടെ.

ജീവന്‍ പോയെന്നു കരുതിയ നിമിഷങ്ങള്‍

2008-07-08T08:31:00.000+05:30

ജീവിതം അവസാനിച്ചെന്നു കരുതിയ നിമിഷങ്ങള്‍ രണ്ടു പ്രാവശ്യം എന്റെ ജീവിതത്തിലുണ്ടായിട്ടുണ്ട്‌.
ഒന്ന്‌, എന്റെ വല്യുമ്മ(ഉപ്പയുടെ ഉമ്മ)യോടൊപ്പം ഒരു ബന്ധുവീട്ടില്‍ പോയപ്പോഴാണ്‌. അന്ന്‌ ഞാനും വല്ല്യുമ്മയും അടുത്തുള്ള കുളത്തിലേക്ക്‌ കുളിക്കാന്‍ പോയി. ഞാന്‍ വെള്ളത്തിലിറങ്ങി നീന്തിക്കളിച്ചുകൊണ്ടിരുന്നു. ഇതിനിടയില്‍ കുളത്തിന്റെ പടവുകളില്‍ നിന്നും എന്റെ കാലുകള്‍ തെന്നിമാറിക്കൊണ്ടിരുന്നു. ഞാന്‍ കുറേശ്ശേയായി ആഴത്തിലേക്കെത്തിക്കൊണ്ടിരിക്കുകയാണ്‌. വല്യുമ്മ പുറംതിരിഞ്ഞുനിന്ന്‌ കാലുകളും ചെരിപ്പും തേച്ച്‌ വൃത്തിയാക്കിക്കൊണ്ടിരിക്കുകയാണ്‌. ഏതോ ഒരു നിമിഷത്തില്‍ അവര്‍ തിരിഞ്ഞുനോക്കി. എന്നെ കാണുന്നില്ല. വല്യുമ്മ കാണുകയാണെങ്കില്‍ പിടിച്ചോട്ടെ എന്നു കരുതി ഞാനെന്റെ കൈ നീട്ടിപ്പിടിച്ചു. ഭാഗ്യം! ഒരു നല്ല നിമിഷത്തില്‍ അവരെന്റെ കൈ കണ്ടു, നിമിഷങ്ങള്‍ക്കകം ആഴത്തില്‍നിന്നും പിടിച്ചുകയറ്റി. ഞാന്‍ ജീവിതത്തിലേക്ക്‌ തിരിച്ചുവന്നു. അന്ന്‌ അവര്‍ തിരിഞ്ഞുനോക്കിയില്ലായിരുന്നുവെങ്കില്‍....!

മറ്റൊരു സംഭവം എന്റെ ഉമ്മയുടെ വീ്‌ട്ടില്‍ പോയ സമയത്താണ്‌. ഞാനും എന്റെ മൂത്തമ്മയുടെ (ഉമ്മയുടെ ജ്യേഷ്ടത്തിയുടെ) മക്കളും കൂടിയാണ്‌ അല്‍പമകലെയുള്ള പുഴയിലേക്ക്‌ കുളിക്കാന്‍ പോയത്‌. അവര്‍ക്ക്‌ നീന്തലറിയാം. എനിക്കറിയില്ല. ഞാനും അവരോടൊപ്പം ആഴമില്ലാത്ത സ്ഥലം നോക്കി നീന്തിക്കളിച്ചുകൊണ്ടിരുന്നു. പെട്ടെന്ന്‌ ഞാന്‍ നിന്നിരുന്ന പാറക്കല്ലില്‍നിന്നും കാല്‍ തെന്നി മാറി. ഞാന്‍ പുഴയിലേക്കാഴ്‌ന്നുകൊണ്ടിരുന്നു. എല്ലാം അവസാനിച്ചെന്ന്‌ ഞാന്‍ കണക്കുകൂട്ടി. ഒഴുക്കുള്ള പുഴയില്‍ വെപ്രാളപ്പെട്ട്‌ ഞാന്‍ കയ്യും കാലും ഇളക്കിമറിച്ചുകൊണ്ടിരുതുകാരണം അവര്‍ എന്നെ പിടിച്ചുവലിച്ച്‌ കയറ്റാന്‍ ശ്രമിച്ചെങ്കിലും സാധിച്ചില്ല. ഞാന്‍ പിടുത്തം വിട്ട്‌ കൂടുതല്‍ ആഴത്തിലേക്കെത്തിത്തുടങ്ങി.
ജീവിതത്തിലെ കഴിഞ്ഞുപോയ നിമിഷങ്ങളെ ഞാനോര്‍ത്തു... പല പല കാഴ്‌ചകള്‍, വ്യക്തികള്‍, സംഭവങ്ങള്‍... ഭാവിജീവിതത്തിനു വേണ്ടി നെയ്‌തുവെച്ച സ്വപ്‌നങ്ങള്‍... എല്ലാം ഞാനോര്‍ത്തു. ഇതാ, ഈ നിമിഷം എല്ലാം അവസാനിക്കാന്‍ പോവുകയാണ്‌, പ്രിയ ജീവിതമേ വിട.... എല്ലാവര്‍ക്കും സലാംചൊല്ലി പിരിയാന്‍ ഞാന്‍ തീര്‍ച്ചപ്പെടുത്തി. രക്ഷയുടെ യാതൊരു മാര്‍ഗ്ഗവും മുന്നില്‍ ഞാന്‍ കാണുന്നില്ല. പുഴയിലെ വെള്ളം എന്റെ വയറ്റില്‍ ഇതിനകം നിറഞ്ഞുകഴിഞ്ഞിരുന്നു.
ഈ സമയം എന്റെ കൂട്ടുകാര്‍ എനിക്കുവേണ്ടി ഉച്ചത്തില്‍ നിലവിളിച്ച്‌ ശബ്ദമുണ്ടാക്കിക്കൊണ്ടിരുന്നു.
തൊട്ടടുത്ത പള്ളിയില്‍ നിസ്‌കരിച്ചുകൊണ്ടിരിക്കുകയായിരുന്ന പ്രായമായ (എന്നാല്‍ ആരോഗ്യവാനുമാണ്‌) ഒരാള്‍ ഓടിവന്ന്‌ പുഴയിലേക്കെടുത്തുചാടി. എന്നെ കരകയറ്റി രക്ഷിച്ചു. എന്നെ അന്ന്‌ രക്ഷിച്ചയാള്‍ ആരാണ്‌? എനിക്കിന്നുമറിയില്ല. ആ സഹൃദയമനസ്സിന്‌ ഒരായിരം നന്ദി.

ബ്ലോഗ്‌ അക്കാദമി സമീപനം

2008-05-04T09:10:00.000+05:30

കേരള ബ്ലോഗ്‌ അക്കാദമി 2008 ഏപ്രില്‍ 27 ഞായറാഴ്‌ച കോഴിക്കോടുവെച്ച്‌ നടത്തിയ ബ്ലോഗ്‌ ശില്‍പശാലയില്‍ ഞാന്‍ പങ്കെടുത്തു. സംഘാടകരും ക്ലാസുകളെടുത്തവരും കാണിച്ച സൗഹൃദസ്വഭാവം എന്നെ ആകര്‍ഷിച്ചു. മറ്റുള്ളവരെ സഹായിക്കാനുള്ള അതിയായ താത്‌പര്യം സംഘാടകരില്‍ എല്ലാവരിലും കണ്ടു. വളരെ പോസിറ്റീവായ ഒരു മൈന്റാണിത്‌. ഇന്റര്‍നെറ്റില്‍ ഇത്തരം പരസഹായ മനോഭാവങ്ങള്‍ പലപ്പോഴും കാണാം. സാധാരണ പരിപാടികളിലെന്നപോലെയുള്ള, വേദിയിലുള്ളവരും സദസ്സിലുള്ളവരും തമ്മിലുള്ള വേര്‍തിരിവ്‌ ഇവിടെ കണ്ടില്ല. സ്‌റ്റേജില്‍ കസേരയില്ലായിരുന്നു. സ്‌റ്റേജില്‍ കയറിയിരുന്ന്‌ മെയിനാവാന്‍ ആരും ശ്രമിച്ചതായി കണ്ടില്ല.